按：方蓬壶和赵桂林两个并用晚饭之后，外婆收拾下楼。

    稍停片刻，蓬壶即拟兴辞。桂林苦留不住，送出楼门日，高声喊“外婆”，说：“方老爷去哉！”

    外婆听得，赶上叫道：“方老爷慢点喤，我搭耐说句闲话。”

    蓬壶停步问：“说啥？”外婆附耳道：“我说耐方老爷末，文君玉搭要勿去哉，倪搭一样个呀。我搭耐做个媒人，阿好？”

    蓬壶骤闻斯言，且惊且喜，心中突突乱跳，连半个身子都麻木了，动弹不得。外婆只道蓬壶踌躇不决，又附耳道：“方老爷，耐是老客人，勿要紧个。就不过一个局，搭仔下脚，无拨几花开消，放心末哉。”蓬壶只嘻着嘴笑，无话可说。

    外婆揣知其意，重复拉回楼上房间里。桂林故意问道：“为啥耐忙煞个要去，阿是想着仔文君王？”外婆抢着说道：“啥勿是嗄，难末勿许去个哉！”桂林道：“文君玉来浪喊哉喤，耐当心点！明朝去末，端正拨生活耐吃。”蓬壶连说：“岂有此理，岂有此理！”外婆没事自去。

    桂林装好一口鸦片烟，请蓬壶吸，蓬壶摇头说：“勿会。”

    桂林就自己吸了。蓬壶因问：“有几花瘾？”桂林道：“吃白相，一筒两筒，陆里有瘾嗄！”蓬壶道：“吃烟人才是吃白相吃上了瘾，终究要勿去吃俚好。”桂林道：“倪要吃上仔个瘾，阿好做生意？”

    蓬壶遂问问桂林情形，桂林也问问蓬壶事业。可巧一个父母姊妹俱没，一一个妻妾子女均无；一对儿老夫老妻，大家有些同病相怜之意。

    桂林道：“倪爷也开个堂子。我做清情人辰光，衣裳、头面、家生倒勿少，才是倪娘个物事。上仔客人个当，一千多局帐漂下来，难末堂子也歇哉，爷娘也死哉，我末出来包房间，倒空仔三百洋钱债。”蓬壶道：“上海浮头浮脑空心大爷多得势，做生意划一难煞。倒是倪一班人，几十年老上海，叫叫局，打打茶会，生意末勿大，倒勿曾坍歇台。堂子里才说倪是规矩人，蛮要好。”桂林道：“故歇我也匆想哉，把势饭勿容易吃，陆里有好生意做得着？随便啥客人，替我还清仔债末就跟仔俚去。”蓬壶道：“跟人生来最好，不过耐当心点，再要上仔个当，一生一世吃苦哚唍。”桂林道：“难是匆个哉。起先年纪轻，勿曾懂事体，单喜欢标致面孔个小伙子，听仔俚哚海外闲话上个当；故歇要拣个老老实实个客人，阿有啥差嗄？”蓬壶道：“差是匆差，陆里有老老实实个客人去跟俚？”

    说话之间，蓬壶连打两次阿欠。桂林知其睡的极早，敲过十点钟，喊外婆搬稀饭来吃，收拾安睡。不料这一夜天，蓬壶就着了些寒，觉得头眩眼花，鼻塞声重，委实不能支持。桂林劝他不用起身，就此静养几天，岂不便易。蓬壶讨副笔砚，在枕头边写张字条送上吟坛主人，告个病假，便有几个同社朋友来相问候。见桂林小心伏侍，亲热异常，诧为奇遇。

    桂林请了时医窦小山诊治，开了帖发散方子。桂林亲手量水煎药，给蓬壶服下。一连三日，桂林顷刻不离，日间无心茶饭，夜间和衣卧于外床，蓬壶如何不感激？

    第四日热返身凉，外婆乘间撺掇蓬壶讨娶桂林。蓬壶自思旅馆鳏居，本非长策。今桂林既不弃贫嫌老，何可失此好姻缘？

    心中早有七八分允意。及至调理全愈，蓬壶辞谢出门，迳往抛球场宏寿书坊告诉老包。老包力赞其成。蓬壶大喜，浼老包为媒，同至尚仁里赵桂林家当面议事。

    老包跨进门口，两厢房倌人、娘姨、大姐齐声说：“咿，老包来哉！”李鹤汀正在杨媛媛房间里，听了，也向玻璃窗张觑；见是老包，便欲招呼；又见后面是个方蓬壶，因缩住嘴，却令赵家娒楼上去说：“请包老爷说句闲话。”

    约有两三顿饭时，老包才下楼来。李鹤汀迎见让坐。老包问：“