翠凤一件件指点明白：某物在某所，某物在某所。黄二姐嘻开嘴，胡乱答应，实未留心。

    翠凤一直接说道：“再有我家常著个衣裳，同零零碎碎白相物事，帐末勿曾开，才来里官箱里，无娒空仔点查末哉。”

    黄二姐笑讽道：“耐也该应吃力哉呀，吃筒水烟，请坐歇喤。”

    翠凤果然觉得疲乏，和黄二姐对面坐下。黄珠凤慌的过来装水烟。黄金凤正陪著子富说笑，亦遂停止。大家相视，嘿嘿无言。帐房先生料无他事，随带帐簿，领了相帮下楼。赵家娒、小阿宝陆续各散。

    翠凤特地叫声“无娒”，从容规谏道：“我几花衣裳、头面，多末勿算多，撑得来也勿容易。今朝我交代仔无娒，无娒收作去，耐要自家有淘成点末好。再拨来姘头骗仔去，耐要吃苦个喤！耐几个老姘头，才是夷场浪拆梢流氓；靠得住点正经人，一个也无拨。我眼睛里见末，勿晓得拨俚哚骗仔几花哉！

    我个物事，幸亏我捏牢子，替无娒看好来浪，一径到故歇，勿曾骗得去。倘然来哚无娒手里，故欧也无拨个哉。我末做仔四五年大生意，替无娒撑仔点物事，原有今朝日脚，无娒面浪总算我有交代。该搭事体我完结哉，倒是无娒个无淘成，有点勿放心。我去仔，再有啥人来说耐嗄！耐末去听仔姘头个闲话，勿消四五年，骗仔耐洋钱，再骗耐物事，等耐无拨仔，让耐去吃苦。耐力仔姘头吃个苦，阿好意思教人照应点？耐也无拨面孔去说唍！”一席话，说得黄二姐无地容身，低下头去，拨弄手中一把钥匙。子富但微微的笑。

    翠凤又叫声“无娒”，道：“耐要勿怪我多说多话，我是替无娒算计。我赎身末赎仔出去，我个亲人单有耐无娒，随便到陆里，总是黄二姐哚出来个囡仵。无娒好，我也体面点；勿好，大家坍台。无娒样色样才无啥，做生意蛮巴结，当个家蛮明白，就是来里姘头面浪吃个亏。我为仔看勿过，说说耐。难下去我也匆好说个哉。耐要自家有淘成，五十多岁个年纪，原像仔先起头实概样式，做出点话靶戏拨小干仵笑话，我倒替耐难为情。”

    黄二姐听了，坐着不好，走开不好，渐渐涨的满面鲜红。

    翠凤不忍再说下去，乃更端道：“我说耐故歇就拿一千洋钱买个把讨人，衣裳、头面才有来浪，做点生意下来，开消也够哉。

    再歇两年，金凤梳仔个正头，刚刚接下去，故末再好无拨。珠凤生来无用场，倘忙有人家要末，倒让俚好场花去罢。金凤阿有啥说嗄，定归是挨一挨二个时髦倌人；就说勿时髦，抵桩也像仔我末哉唍。无娒依仔我，是无娒福气。”

    子富连连点头，叉口道：“故倒是正经闲话，一点勿差。”

    翠凤道：“价末起先头闲话阿是说差哉？”黄二姐因而插嘴道：“才是好闲话，陆里有差嗄！”说罢，起立徘徊，自言自语道：“俚哚该应来快哉，我下头去等来浪。”遂拨转头，径归楼下小房间。

    翠凤在后手指黄二姐脊背，低声向子富道：“耐看俚，越说俚越是个厚皮！难我说过仔勿说哉，俚要去吃苦，等俚歇。”

    子富道：“俚做老鸨苦恼。拨耐埋冤煞，一声也匆敢响。”

    翠凤道：“耐说哉喤，七姊妹沟里阿有啥好人！倪要做差仔点，拨俚打起来要死。”子富道：“我勿相信。”翠凤道：“耐勿相信，看诸金花。俚哚七姊妹，我碰着三个人。诸三姐比仔倪无娒好得野哚，就不过打仔两顿。要是倪无娒个讨人，定归要死勿死，要活勿活，教俚试试看末晓得哉。”

    子富笑而不语，翠凤叹口气道：“要勿说是倪无娒，耐看上海把势里陆里个老鸨是好人！俚要是好人，陆里会吃把势饭！

    再有个郭孝婆，耐也晓得点哉唍。故歇自家元拨讨人，再要去帮诸三姐打个诸金花，耐说阿要讨气！”