按：黄翠凤当着王莲生，即向罗子富说道：“倪个无娒终究是好人，听俚闲话末好像蛮会说，肚皮里意思倒不过实概。

    耐看俚，三日天气得来饭也吃勿落。昨日耐去仔，俚一干子来哚房间里反仔一泡。今朝赵家娒下头去，无娒看见仔，就搭赵家娒说，说我个多花勿好，说起：‘我衣裳、头面买俚要万把洋钱仔，勿然，俚赎身末我想多拨点俚，故歇定归一点也勿拨俚个哉！’我来里楼浪，刚刚听见，晰气末咿好笑。难末我去搭无娒说说明白，我说：‘衣裳、头面才是我撑个物事。我来里该搭，我个物事，随便啥人匆许动。我赎仔身，阿好带得去？

    才要交代无娒个唍。悄然无娒要拨点我，勿是我客气，谢谢无娒，我末一点也匆要。要勿说啥衣裳、头面，就是头浪个绒绳，脚浪个鞋带，我通身一塌括仔换下来交代仔无娒，难末出该搭个门口。无娒放心末哉，我一点也匆要。’陆里晓得，倪无娒倒真个要分点物事拨我。俚道仔我末定归要俚几花哚。我说仔一点勿要，故末倪无娒再要快活也无拨，教我赎身末赎末哉，一千身价就一千米哉，替我看仔个好日子，十六写纸，十七调头，样式样才说好。耐说阿要快？就是我也匆可帐实概个容易。”

    子富听了，代为翠凤一喜。

    莲生不胜叹服，赞翠凤好志气，且道：“有句闲话说：‘好男勿吃分家饭，好女勿着嫁时衣。’赛过就是耐。”翠凤道：“做个倌人，总归自家有点算计，故末好挣口气。倘然我赎身出去，先空仔五六千个债，倒说勿定生意好勿好，我就要挣气也挣勿来。故歇我是打好仔稿子做个事体，有几户客人，匆来里上海才匆算，来里上海个客人就不过两户，单是两户客人照应照应我，就匆要紧个哉。五六千个债也写意得势，我也犯勿着要俚哚衣裳、头面。王老爷说得好，‘嫁时衣’还是亲生爷娘拨来哚囡仵个物事，囡仵好末也要勿着。我倒去要老鸨个物事！就要得来，碰关千把洋钱，啥犯着嗄？”莲生仍赞不绝口。

    子富却早知赎身之后定有一番用度，自应格外周全；只不料其如许之多；沉吟问道：“陆里有五六千个债？”翠凤道：“耐说无拨五六千，耐算喤：身价末一千；衣裳、头面开好一篇帐来里，煞死要减省末三千；三间房间铺铺，阿要千把？连搭仔零零碎碎几花用场，阿是五六千哚？故歇我就教带得去个赵家娒同下头一个相帮，先去借仔二千，付清仔身价，稍微买点要紧物事，调头过去再说。”子富默然。

    莲生吸过四五口烟，抬身箕坐。金凤忙取水烟筒要装，莲生接来自吸。

    消停良久，子富方问起调头诸事。翠凤告诉大概：看定兆富里三间楼面，与楼下文君王合借；除带去娘姨、相帮之外，添用帐房、厨子、大姐、相帮四人；红木家生暂行租用，合意议价。又道：“十六俚哚写纸，我末收捉物事交代无娒，无拨空，耐就月半吃仔台酒末哉。”子富遂面约了莲生，并写了张条子请葛、洪、陈三位，令高升立刻送去。

    高升赶往东合兴里吴雪香家，果然洪善卿、陈小云为阻雨未散。看过条子，葛仲英先道：“我只好谢谢哉，一笠园约定来浪。”小云亦以此约为辞。止有善卿准到，写张回条，打发高升复命。却听窗外雨声渐渐停歇，凉篷上点滴全无，洪善卿遂蹈隙步行而去。

    小云从容问仲英道：“倌人叫到仔一笠园，几日天住来浪，算几花局嗄？”仲英道：“看光景起，园里三四个倌人常有来浪，各人各样开消。再有倌人自家身体，喜欢白相，同客人约好仔，索性花园里歇夏，故也只好写意点。”小云道：“耐阿是带仔雪香一淘去？”仲英道：“有辰光一淘去。到仔园里再叫也无啥。”小云自己盘算一回，更无他话，辞别仲英，径归南昼锦里祥发吕宋票店。

    明日，陈小云亲往抛球场相熟衣庄，拣取一套簇新时花浅