惭愧，且不去看请帖，笑问匡二道：“耐陆里晓得我来里该搭？”匡二尚未回言，诸三姐在傍拍手笑道：“俚是昨日跟四老爷一淘来个呀，阿是四老爷勿晓得？”

    说着，又指定匡二呵呵笑道：“幸亏我昨日勿曾骂耐。为仔耐闲话稀奇，我想总是认得点倪个人；勿然，再要拨两记耳光耐吃哉。”李实夫也自讪笑，手持请帖，仍上楼去。

    匡二待要退出，诸三姐慌道：“来仔末，啥就去嗄？请坐歇喤。”一手挽了匡二臂膊，挽进客堂，捺向高椅坐下，随取一支水烟筒奉敬，并筛一杯便茶，和匡二问长问短，亲热异常。

    匡二也问间生意情形。诸三姐遂凑近匡二身边，悄地长谈道：“倪先起头勿是做生意个呀，为仔今年一桩事体匆过去，难末做起个生意。刚刚做生意，第一户客人就碰着四老爷，也总算是倪运气。四老爷是规矩人，勿欢喜多花空场面。像倪该搭老老实实，清清爽爽，四老爷倒蛮对。不过倪做仔四老爷，外头人才说是做着仔好生意，搭倪吃醋，说倪多花邱话，说拨四老爷听。倪搭算得老实个哉，俚哚说愧是假个；倪搭算得清爽个哉，俚哚倒说倪勿干净。听仔该号闲话，真真讨气！故歇四老爷也匆去听俚哚，倪终有点勿放心。倘忙四老爷听仔俚哚，倪搭匆来仔，倪是无拨第二户客人唍，娘囡仵阿是要饿煞？我为此要拜托耐匡大爷，劝劝四老爷，要勿去听别人个闲话。匡大爷说，比仔倪自家说个灵。”

    匡二不知就里，一味应承，谈够多时，匡二始起身告别。

    诸三姐送至门酋，说道：“无啥公事末，该搭来坐歇末哉。”

    匡二唯唯而去。

    诸三姐关门回来，照常请李实夫点菜便饭。诸十全虽与实夫同吃，却因忌口，不吃馆菜，另用素撰相陪。

    饭后，李实夫照常往花雨楼去开灯。堂倌早为留出一榻，并装好一口烟在枪上。实夫吸了一会，陆续上市，须臾撑堂，来者还络绎不绝。忽见那个郭孝婆偏又挤紧眼睛摸索而来，缘见过实夫一面，早被他打听明白，摸至榻前，即眉花眼笑的叫声“四老爷”，问：“十全搭阿去？”实夫只点点头。堂倌见郭孝婆搭腔，便抢过来坐在烟榻下手，看定郭孝婆，目不转睛。

    郭孝婆冷笑一声，低头走开。堂倌乃躺下给实夫烧烟，问实夫：“耐陆里去认得个郭孝婆？”实夫道：“就来里诸三姐搭看见俚。”堂倌道：“诸三姐末也匆好，该号杀胚，再去认得俚做啥？耐看俚末实概年纪，眼睛才瞎个哉，俚本事大得野哚，真真勿是个好东西！”实夫笑问为何。堂倌道：“就前年宁波人家一个千金小姐，俚会得去骗出来，来浪夷场浪做生意。拨县里捉得去，办俚拐逃，揪二百藤条，收仔长监；勿晓得啥人去说仔个情，故歇倒放俚出来哉。”实夫初不料其如此稔恶，倒不禁慨叹一番。

    堂倌烧成烟泡，授与实夫，另去应酬别榻。迨至实夫匣中烟尽，见吃客渐稀，也就逐队而散；既不去金巧珍家赴席，又不回长安客栈，竟一直往诸十全家来。

    自李实夫做诸十全之后，五日再宿，秘而不宣；今既为匡二所见，遂不复隐瞒，索性留连旬日不返，惟匡二逐日探望一次。有时遇见诸十全脸晕鲜红，眼圈乌黑，匡二十分疑惑，因暗暗告诉主人李鹤汀。鹤汀兀自不信。

    这日四月初间，天气骤热，李实夫适从花雨楼而回，尚未坐定，复闻推门响声，却是匡二，报说：“大少爷来哉。”诸三姐一听着了慌，正要请实夫意旨，李鹤汀已款步进门。诸三姐只得含笑前迎，说：“四老爷来里楼浪。”鹤汀乃令匡二在客堂伺候，自己径上楼来，与实夫叔侄相见。诸十全也起身叫声“大少爷”，掩在一傍局促不安。实夫问鹤汀何处来。鹤汀说：“来浪坐马车。”实夫道：“价末杨媛媛喤？”鹤汀道：“俚哚先转去哉。”

    说时，诸三姐送上