也赛过做好事。

    不过倪勿好意思搭耐说，搭耐说仔倒好像是倪来拆耐李老爷梢。”

    实夫焦躁道：“耐要勿实概喤，有闲话爽爽气气说出来末哉。”

    诸三姐又叹了一口气，方从头诉道：“说起来，总是俚自家运气勿好。为仔正月里俚到娘舅家去吃喜酒，俚家主公末要场面，拨俚带仔一副头面转来，夜头放来哚枕头边，到明朝起来辰光说是无拨哉呀。难末害仔几花人四处八方去瞎寻一泡，陆里寻得着嗄？娘舅哚末吓得来要死，说寻勿着是只好吃生鸦片烟哉。

    俚家主公屋里还有爷娘来哚，转去末拿啥来交代喤？真真无法子想哉！难末说勿如让俚出来做做生意看，倘忙碰着个好客人，看俚命苦，肯搭俚包瞒仔该桩事体，要救到七八条性命哚！我也无投啥主意哉，只好等俚去做生意。李老爷，耐想俚家主公屋里也算过得去，夫妻也蛮好，勿然啥犯着吃到仔该碗把势饭喤？”那诸十全睡在床上，听诸三姐说，更加哀哀的哭出声来。

    实夫搔耳爬腮，无法可劝。诸三姐又道：“李老爷，故歇做生意也难，就是长三书寓，一节做下来差勿多也不过三四百洋钱生意。一个新出来人家人，生来勿比得俚哚，要撑起一副头面来，耐说阿容易？俚有辰光搭我说说闲话，说到仔做生意末，就哭。俚说生意做勿好，倒勿如死仔歇作，阿有啥好日脚等出来！”实夫道：“年纪轻轻说啥死嗄？事体末慢慢交商量，总有法子好想。耐去劝劝俚，教俚要勿哭喤。”

    诸三姐听说，乃爬上床去向诸十全耳朵边轻轻说了些甚么。

    诸十全哭声渐住，着衣起身。诸三姐方下床来，却笑道：“俚出来头一户客人就碰着仔耐李老爷，俚命里总还勿该应就死，赛过一个救星来救仔俚。李老爷阿对？”实夫俯首沉吟，一语不发。诸三姐忽想起道：“阿呀！说说闲话倒忘记哉，李老爷吃啥点心？我去买。”实夫道：“买两个团子末哉。”诸三姐慌的就去。

    实夫看诸十全两颊涨得排红，光滑如镜，眼圈儿乌沉沉浮肿起来，一时动了怜惜之心，不转睛的只管呆看。诸十全却羞的低头下床，趿双拖鞋，急往后半间去。随后诸三姐送团子与实夫吃了，诸十全也归房洗脸梳头。实夫复吸两口烟，起身拿马褂来着，向袋里掏出五块洋钱放在烟盘里。诸三姐问道。“阿是耐要去哉？”实夫说：“去哉。”诸三姐道：“阿是耐去仔匆来哉？”实夫道：“啥人说匆来。”诸三姐道：“价末啥要紧嗄？”即取烟盘里五块洋钱仍塞在马褂袋里。

    实夫怔了一怔，问道：“耐要我办副头面？”诸三姐笑道：“勿是呀！倪有仔洋钱，倘忙用脱仔凑勿齐哉，放来哚李老爷搭末一样个唍。隔两日一淘拨来倪，阿对？”实夫始点点头说：“好。”诸十全叮嘱道：“耐晚歇要来个喤！”

    实夫也答应了，着好马褂，下楼出门，回至石路长安栈中。

    不料李鹤汀先已回来，见了实夫，不禁一笑。实夫倒不好意思的。匡二也笑嘻嘻呈上一张请帖。实夫看是姚季莼当晚请至尚仁里卫霞仙家吃酒的。鹤汀问：“阿去？”实夫道：“耐去罢，我匆去哉。”

    须臾，栈使搬中饭来，叔侄二人吃毕。李实夫自往花雨楼去吸烟。李鹤汀却往尚仁里杨媛媛家来。到了房里，只见娘姨盛姐正在靠窗桌上梳头；杨媛媛睡在床上，尚未起身。鹤汀过去揭开帐子，正要伸手去摸，杨媛媛已自惊醒，翻转身来，揣住鹤汀的手。鹤汀即向床沿坐下。杨媛媛问道：“昨夜赌到仔啥辰光？”鹤汀道：“今朝九点钟坎坎散，我是一径勿曾因欧。”媛媛道：“阿赢嗄？”鹤汀说：“输个。”媛媛道：“耐也好哉！一径勿曾听见耐赢歇，再要搭俚哚去赌！”鹤汀道：“要勿说哉。耐快点起来，倪去坐马车。”

    杨媛媛乃披衣坐起，先把捆身子钮好，却憎鹤汀道：“耐